قصة الشقة المسكونة

اسمي احمد متجوز من تسع سنين وعندي بنتين احلي حاجه في حياتي ومامتهم (اسمها مريم)طبعا.

كنت ساكن في شقه كويسه جنب اهلي بس اترقيت في شغلي واتنقلت لموقع جديد للشركة في منطقة ساحلية بس في منطقة مقطوعة شويه.

الشركة وفرت لي شقة قريبة من موقع شغلي الجديد 
وبالفعل نقلنا فيها..بس مراتي مكنتش موافقة في الاول عشان مش عايزه تبعد عن أهلنا والعمار بس لما الحيت عليها وافقت..

ابتديت حكايتي لما في يوم مراتي قالتلي انها بتسمع اصوات غريبه في اوض الشقة ولما بتدخل تشوف في ايه مش بتلاقى حاجه.

كنت دايما بحاول اطمنها واقولها تهيئات بس عشان لسه مخدناش ع الشقه وكده وبيني وبينكم انا كمان مبصدقش في العفاريت والحاجات دي.

مراتي ابتدت تخاف وشكوتها زادت لما ابتدت تشوف حاجات كمان مش تسمع بس كمان بناتي بيقولوا انهم بيشوفوا حاجات غريبه.

صحيت من النوم علي صراخ مراتي جريت بسرعة اتجاه الصرخة اللي كانت جايه من الحمام لقيتها واقعة ع الارض ومغمى عليها شيلتها اخدتها علي السرير وابتديت افوقها.

بعد وقت مش قليل فاقت وكانت مفزوعة ومرعوبه جدا ومسكت فيا جامد وبتترعش وتعيط..

انا سمعت صرخت وجريت ع الحمام لاقيتك واقعة ايه اللي حصل يا حبيبتي..؟؟
انا كنت داخله الحمام أغسل وشي وبعد مدخلت لاقيت باب الحمام اتقفل عليا جريت عليه وحاولت أفتحه متفتحش وحسيت بحد معايا في الحمام اترعبت وقعدت ع الارض وفجأة اللمبة طفت واشتغلت بسرعه ولاقيت واحده شعرها طويل جدا ومنقوش وملامحها مرعبة في وشي ومحستش بحاجه تاني.